作者：林均賢 醫師
昨暗群組傳來米拉離開 ê 消息，腦海中閣出現米拉頂真的表情和笑容。
米拉伊是一个充滿理想 ê 人。伊毋驚困難，發起閣延紲囡仔窟 ê 活動，希望予囡仔有一个會當聽佮講母語 ê 環境。為著囡仔全心投入拍拚 ê 精神，予我足感動。
熟似米拉，是因為幾年前阮阿公王維熙先生逝世了後，我誠思念伊，佇網路揣伊的資料，有一工無意中看著囡仔窟小村子 ê 影片。
影片內底，我 ê 阿公王維熙先生和好朋友劉信賢先生用台語 leh 講故事予一群囡仔聽，雖然囡仔爬來爬去，無認真咧聽，毋閣舉辦囡仔窟的精神，予我非常 ê 感動。
轉來新竹了後，透過米拉的紹介，我開始參加新竹市母語協會 ê 活動，伊邀請我用醫師ê角度舉辦健康講座，用台語來分享醫學常識。
今年7月16，我佇母語協會演講，題目是：「我 ê 台語路 kah 逐家攏愛關心 ê 健康常識」這是我第一改用全台語演講，對我來講誠有意義，在座 ê 攏是阮阿公以前定定鬥陣 ê 朋友。
米拉蹛院時，我門診結束捌去看伊兩改，第一改伊準備欲開刀，第二改已經開刀成功，開始食物件矣。伊雖然拄才開刀，猶閣誠有精神，閣 leh 讀客語檢定的冊，馬共我介紹幾本伊紮來ê台語小說。
病床邊仔我靜靜 leh 聽，伊雖然身體虛毋閣誠歡喜，講 leh 誠認真講無停，親像病攏好去來矣。
最後一改聽著米拉 ê 聲音是頂禮拜和許教授通電話，聽著伊用虛弱 ê 聲音講欲參加台語ê教會...。
想袂到病院彼日是我看著米拉最後 ê 一面、電話中 ê 聲音是我最後一改聽著米拉 ê 聲。伊對母語 ê 堅持，是堅持到最後一口氣...。
人 ê 一生有長有短，重要 ê 是活了是毋是有意義。米拉 ê 一生雖然無偌長，但是活了精采、有意義。伊是一个賢慧 ê 太太、盡職 ê 母親、嘛是一位足好鬥陣、予人永遠懷念 ê 朋友。
米拉已經走過死蔭 ê 幽谷，卸去一切 ê 勞苦和重擔，願伊安息。
咱活咧 ê 人，嘛愛繼續拍拚，用米拉 ê 精神，努力保存台灣 ê 本土語言和文化，米拉佇天頂嘛 ê 替咱歡喜。
請許維德教授身體保重。
願上帝 ê 恩典佮疼痛賜予米拉伊在世所愛 ê 每一个人，直到永遠。
林均賢敬筆。
主後 2022 年 10 月 28 日
